التاريخ : 2015-06-11
رسالة نارية من اهل العقبة لزوارها ..!!
الراي نيوز
رسالة الى جميع زوار مدينة العقبة الكرام بمناسبة العطلة الصيفية ، نرفق لكم لبعض النصائح الهامة نرجو اخذها بعين الاعتبار اثناء استمتاعكم بزيارة مدينتنا الحبيبة:
١. 'لا تركض ورا صاحبك بين مقاعد وفرشات الناس ، لانك تقريبا بتذايقهم .. انسى كيف هما بيتطلعو عليك بعدها وكم مسبة بتلحقك' .
٢. 'الاكل عالبحر حلو واله رونقه .. اتفضل واستمتع باي اكل انت بتحبه (مشاوي ، بزر، تشقحلك بطيخه كنت سايبها ساعتين تبورد من مية البحر ،،، قاعد تمزمز ترمس) بس ياريت تنظف وراك قبل ماتقوم بشقفة كيس بلاستيك جيبه معك وحط المخلفات هاي بالزباله .. مافي داعي كل شوي نطلع المجموعات الكشفية والغواصين يشيلو هالبلاوي ويتصورو بالاخر جنب جبال زباله طلعوها من البحر والشط بسببك وبسبب غيرك اللي اتعاجز بس يلم وراه' .
٣. 'لا تسأل اي حد وين في مساج بالعقبة .. عفكرة سكرو هالمحلات واللي بيسأل عنها مشبوه بيكون بنظرنا' .
٤. 'يالله ما احسنك انت وصحابك وعيلتك لو تبطلو سولافة المراشقة بالمي وانتو عالبحر وتحمموا كل اللي حواليكم.. مايصير انك تحمم خلق ربنا بمراشقتك بس عشان تنبسط .. يا اخي مابدنا نشاركك بمزحك انت وصحابك '.
٥.' بالنسبة للي دمهم خفيف كثير وبيحبوا يغطسوا راسهم بالبحر ويطلع صوت (بولولوم بولولوم ) كانه بيغرق والناس تتطلع عليه.. دير بالك يمكن تغرق جد وماحد يتطلع بخلقتك .. ويمكن تخوف الاطفال بخفة دمك الزايدة'.
٦. 'مسجل سيارتك مش ضروري اللي ساكن معان يسمع صوت مسجل سيارتك'.
٧. 'نداء الى اصحاب السيارات الخصوصية : في ثقافة جميله باهل وسكان العقبة انهم بيوقفوا عند ممر المشاه .. التزم لو سمحت مش شطارة تزورق حالك وتدعسلك اكم من واحد بالغلط العقبة مدينه صغيرة واكبر مشوار بتوصله خلال ١٠ دقايق مافي داعي تصرصعنا معك'
٨.' نفس الكلام للزائرين المشاه ،، في عندكم ممر مشاه اوقف عليه شوي والسيارات راح توقفلك .. مش نلاقيك فجاة بنص الشارع ناط من فوق السياج اللي في الجزيرة الوسطية او بتقطع ممر المشاه بدون ماتكلف نفسك توقفلك دقيقه او اثنين بس تتطلع يمين وشمال.. والله بنحكي لاجل سلامتك الشخصية انت وعائلتك'
٩. 'الحمد لله عنا بالعقبة شغلانة التطقيس ورمي الحكي عالبنات يعني قليله .. والكل بيعرف بعض بهالعقبة واحتمالية انه يشوفك حد بيعرف البنت او بيقربلها .. ومعها بصيراحتمالية انه تجيب لحالك قصة كبيرة دير بالك تعاكس بنات العالم' .
١٠. 'من الطبيعي انه لما تنزل على العقبة نهاية الأسبوع او في الأعياد ماراح تلاقي شقق فاضية و اذا لاقيت راح تكون غالية كتير فمن الطبيعي انك تنام بالشارع او بالسيارة فتأكد من حجز الشقة قبل ما تنزل عالعقبة او خليها بنص الأسبوع'
١١. لو عندك طفل صغير وعمره اربع سنين فما دون .. ياريت لبسه اشي قبل ماتنزله البحر ولا تنزله عريان .. !!!!!!
١٢. في ناس بتحب تصيد عند هالجسر وبتلاقي معها صنارة وخيط - زي الافلام بالزبط- ... بالله عليك لا تضلك رايح جاي حواليه تقززه بعيشته .. لانها هواية صاحبها يمتاز بحب الهدوء .. ولو صاد سمكة لا تروح تركض عليه ورينا اياها وخليني اتصور معها واوريها لابني وامسكها لعيلتي ؟؟؟ شو يارجل ماشفت سمك قبل هيك .. الزلمه صاد سمكه مش مطلع صندوق ذهب !
١٣. في فرق كثير كبير بين شورت السباحه و الملابس الداخلية (underwear ).. وانت بتسبح بالبحر / المسبح اوعك تنزل تسبح بملابسك الداخلية اللي هتبين لكل العالم الاسرار الخاصه فيك ،،، انت مابترضى انه اي حد يتمشى بحارتكم وهو لابس (underwear ) صح ؟ في عنا احنا كمان عائلاتنا مابنحب انهم يتعرضو لهيك شخص بيتمشى بملابسه الداخلية ولا حتى انت بترضى لعيلتك تشوف حد غريب عنها لابس هيك .
نتمنى لكم اقامة طيبة ..
